സി.ബി.എസ്.ഇ. ഒറ്റപ്പെൺകുട്ടി സ്കോളർഷിപ്പ്

സെൻട്രൽ ബോർഡ് ഓഫ് സെക്കൻഡറി എജുക്കേഷൻ (CBSE) സ്കൂളിൽ നിന്ന് 2024-ൽ 70% മാർക്കോടെ പത്താം ക്ലാസ് പാസായി, പ്ലസ് ടു തലത്തിൽ സി.ബി.എസ്.ഇ. സ്കൂളിൽ തുടർന്നും പഠിക്കുന്ന ഒറ്റപ്പെൺകുട്ടികൾക്ക്, സി.ബി.എസ്.ഇ. മെറിറ്റ് സ്റ്റോളർഷിപ്പിന് അപേക്ഷിക്കാം.

പെൺകുട്ടികളുടെ വിദ്യാഭ്യാസം പ്രോത്സാഹിപ്പിക്കാനുള്ള രക്ഷിതാക്കളുടെ ശ്രമങ്ങൾക്ക് പിന്തുണ നൽകാനാണ് പദ്ധതി ലക്ഷ്യമിടുന്നത്. രക്ഷിതാക്കൾക്ക് ഒരു കുട്ടി മാത്രമേ ഉണ്ടാകാൻ പാടുള്ളൂ. അത് പെൺകുട്ടിയായിരിക്കണം. ഒരുമിച്ചു ജനിച്ച എല്ലാ പെൺകുട്ടികളെയും ‘ഒറ്റപ്പെൺകുട്ടി’യായി പരിഗണിക്കും.

യോഗ്യത: ഇന്ത്യക്കാരായിരിക്കണം. 2024-ലെ സി.ബി.എസ്.ഇ. പത്താം ക്ലാസ് പരീക്ഷയിൽ കുറഞ്ഞത് 70 ശതമാനം മാർക്ക് നേടിയിരിക്കണം. ക്ലാസ് 11-ലെ പഠനം സി.ബി.എസ്.ഇ. അഫിലിയേഷനുള്ള സ്കൂളിലാകണം. പഠിക്കുന്ന സ്കൂളിലെ പത്താംക്ലാസ് പ്രതിമാസ ട്യൂഷൻ ഫീ 2500 രൂപ കവിയരുത്. 11, 12 ക്ലാസുകളിലെ പ്രതിമാസ ട്യൂഷൻ ഫീ 3000 രൂപയും കവിയരുത്. NRI വിദ്യാർഥികൾക്കും അപേക്ഷിക്കാം. ഇവരുടെ പ്രതിമാസ ട്യൂഷൻ ഫീസ് 6000 രൂപ കവിയരുത്.

കുടുംബ വാര്‍ഷിക വരുമാനം എട്ടുലക്ഷം രൂപ കവിയരുത്. ഇതുസംബന്ധിച്ച രക്ഷിതാവിന്റെ നോൺ-ജുഡീഷ്യൽ നോട്ടറൈസ്‌ഡ് സ്റ്റാമ്പ് പേപ്പറിൽ നൽകുന്ന സെൽഫ്-ഡിക്ലറേഷൻ അപേക്ഷയ്ക്കൊപ്പം ഓൺലൈനായി അപ്ലോഡ് ചെയ്യണം.

പ്രതിമാസം 1000 രൂപ നിരക്കിൽ, രണ്ടുവർഷത്തേക്കാണ് ഇ.സി.എസ്./എൻ.ഇ.എഫ്‌.ടി. വഴി സ്റ്റോളർഷിപ്പ് അനുവദിക്കുക. സ്കൂൾ/ മറ്റ് ഓർഗനൈസേഷനുകൾ നൽകുന്ന മറ്റു സൗജന്യങ്ങൾ ഈ സ്കോളർഷിപ്പിനൊപ്പം സ്വീകരിക്കാം. 11-ാം ക്ലാസിൽ കുറഞ്ഞത് 70% മാർക്കു നേടി പാസായി ക്ലാസ് 12-ലേക്ക് പ്രൊമോഷൻ ലഭിക്കുന്നവർക്ക് രണ്ടാം വർഷത്തിലും സ്കോളർഷിപ്പ് ലഭിക്കും. നല്ല സ്വഭാവം, ഹാജർ ആവശ്യകത എന്നിവയ്ക്കു വിധേയമാണിത്. തിരഞ്ഞെടുത്ത കോഴ്സ് പൂർത്തിയാകും മുമ്പ് ഉപേക്ഷിക്കുക, കോഴ‌്/ സ്കൂൾ മാറുക തുടങ്ങിയ സാഹചര്യങ്ങളിൽ സ്റ്റോളർഷിപ്പ് തുടരൽ/ പുതുക്കൽ, സി.ബി.എസ്.ഇ. തീരുമാനത്തിനു വിധേയമായിരിക്കും. ഒരിക്കൽ റദ്ദാക്കപ്പെടുന്ന സ്റ്റോളർഷിപ്പ് പുനഃസ്ഥാപിക്കുന്നതല്ല.

വിശദമായ മാർഗനിർദേശങ്ങൾ, ഓൺലൈൻ അപേക്ഷയ്ക്കുള്ള ലിങ്ക് എന്നിവ, https://www.cbse.gov.in -ൽ ലഭിക്കും. അപേക്ഷ 2025 ജനുവരി 10-നകം നൽകണം. 2023-ൽ ഈ സ്റ്റോളർഷിപ്പ് ലഭിച്ചവർക്ക് അത് പുതുക്കാൻ ഓൺലൈനായി അപേക്ഷ നൽകാനും ഇതേ സൈറ്റിൽ 10 വരെ അവസരമുണ്ട്.